కుజ దోషము

కుజ దోషము

వివాహ పొంతన విషయమున గమనించవలసిన ముఖ్యాంశాములు

శ్లో .

ధన వ్యయేచ పాతాలే జామిత్రేచ అష్టమే కుజ స్త్రీనాం భర్తృ వినాశఞ్చ భర్తృనాం స్త్రీ వినాశనం

(మతాంతరమున “ధన” అను స్థానమున “లగ్నే” అనియు గలదు)

అనగా, కుజుడు 1, 2, 12, 4, 7, 8 స్థానములందు స్త్రీ జాతకమునందున్న భర్తకు, భర్త జాతకమునందున్న స్త్రీ కి అరిష్టము.  లగ్నము శరీరమునకు, చంద్రుడు మనస్సునకు, శుక్రుడు శృంగారమునకు సంకేతములు కావున ఈ పై చెప్పబడిన స్థానములను జాతకమందు లగ్నము, చంద్రుడు, శుక్రుడు మువ్వురు స్థితి పొందిన స్థానముల నుండి వేరు వేరుగా చూడవలయును. 

ఈ దోషమునకు క్రింద ఉదహరించినవి మినహాయింపులుగా చెప్పబడినవి.

కుజ దోష భంగములు :

(1)          కుజుడు స్వ క్షేత్రము లేక ఉచ్చ క్షేత్రము లేక మిత్ర క్షేత్రములందున్న ఈ దోషము లేదు

(2)         కుజుడు చర రాశులందున్న ఈ దోషము లేదు

(3)         కుజుడు కర్కాటక, సింహా, కుంభములందున్న ఈ దోషము లేదు

(4)         మిధున కన్యలు రెండవ స్థానమైనను, వృషభ తులలు ఒకటవ స్థానమైనను, మేష వృశ్చికములు 4వ స్థానమైనను, కర్కాటక మకరములు 7వ స్థానమైనను, ధనుర్మీనములు 8వ స్థానమైనను ఈ దోషము లేదు.

(5)         కర్కాటక సింహా లగ్నములందు జన్మించిన వారికి ఈ దోషము లేదు

(6)         కుజుడు చంద్ర గురులతో యుతి పొందినను, వారితో చూడబడినను ఈ దోషము లేదు

(7)         కుజుడు రవి, బుధ, శని, రాహువు లతో యుతి పొందినను, వాటితో చూడబడినను ఈ దోషము లేదు

(8)         కుజుడు స్థితి పొందిన రాశ్యాధిపతి లగ్నము నుండి గాని, చంద్రుని నుండి గాని, కేంద్ర కోణములందున్న ఈ దోషము లేదు

(9)         గురుడు గాని, శుక్రుడు గాని లగ్నమునందు స్థితి పొందిన ఈ దోషము లేదు

అయితే, ఈ కుజ దోషము అనునది ప్రాచీన భారతీయ గ్రంధములందు లేదు.  బృహత్ పరాశర హోరా శాస్త్రము మూల గ్రంధమున 96 అధ్యాయములు గలవు.  తదుపరి కాలమున 4 అధ్యాయములు చేర్చబడి మొత్తం 100 అధ్యాయముల గ్రంధమైనది.  ఈ కుజ దోషము అనునది 96 అధ్యాయములు గల మూల గ్రంధమున కనపడుటలేదు.  100 అధ్యాయములు గల గ్రంధమునందున్న కారణమున ఇది ప్రక్షిప్త శ్రుత్యక్షమని భావించవలసి యున్నది.